117
fe‘ilâtün fe‘ilâtün fe‘ilâtün fe‘ilün
1 Çeşm-i şûhıdur iden dilleri ber-bâd ancak
O siyeh-mest harâbat ile âbâd ancak
2 Hânümân-ı dile her bir müjesi gâretger
Sanmañuz gamzesidür ‘âşıka bî-dâd ancak
3 Râzıyuz gerçi elin öpmege biz dildâruñ
Bûs-ı la‘l-i leb imiş dîden-i a‘yâd ancak
4 Mâye-i servetümüz nakd-i sirişk idi müdâm
Hûn-ı dil kaldı iki çeşmüme îrâd ancak
5 Goncenüñ gördi nihânîce tebessümlerini
‘Andelîbe bu dahi bâ‘is-i feryâd ancak
6 Ne revâdur ki bize nîm-nigâh eylemeye
‘Ahd-i hüsninde rakîbi ide dil-şâd ancak
7 Kâmiyâ halka be-gûş eyledi tavk-ı kameri
Bendedür serv dahı nâmıdur âzâd ancak
Yrd. Doç. Dr. Gülgün Erişen YAZICI,, Edirneli Kâmî ve Divanının Tenkitli Metni, (Basılmamış doktora tezi), A. Ü. Sosyal Bilimler Enstitüsü , Ankara, 1998,- https://ekitap.kulturturizm.gov.tr/Eklenti/10619,kamipdf.pdf?0
