. - - - / . - - - / . - - - / . - - -
1.Cebînüñ safhasında ol ki câna iki nûn yazdı
Bu ben âvâreyi ser-defter-i ehl-i cünûn yazdı
2.Muhabbet bezmini telh itdügiyçün kâtib-i kudret
Rakîbüñ nâmı gibi hat-ı la‘lüñ ser-nigûn yazdı
3.Yed-i kudret gülistân safhasına tarh-ı nev saldı
Gelüp fasl-ı bahârî bir bisât-ı sebze-gûn yazdı
4.Perîşân zülfi yârüñ düşürince hayl-i ‘uşşâkı
Dil-i zârı şeh-i ‘aşka gulâm-ı enderûn yazdı
5.‘Atâyî nazm ile kılduñ musahhar ol perî-zâdı
Meger efsâne dirken kilk-i sehhâruñ füsûn yazdı
Saadet KARAKÖSE, NEV’Î-ZÂDE ATÂYÎ DÎVÂNI, Malatya 1994
