Fâ‘ilâtün/ Fâ‘ilâtün/ Fâ‘ilâtün/ Fâ‘ilün
Bülbül artursa niyâzın arturur gül nâz aña
Şeb-nem agzın aradukca gonce açmaz râz aña
Âsmân âstân-ı yâre irişmez eger
İtse yüz biñ yıl hümâ-yı cân u dil pervâz aña
Zülfüñüñ şeh-bâzı dil murgın şikâr eyler yürür
Cân uçursam n’ola ey yâr kebûter bâz aña
Dâmen-i ‘ırzum çeküp çâk itmesün diyü rakîb
Niçe yüzden eyledüm ikrâm ile i‘zâz aña
Çok degül ey dil o meh-rûdan şikâyet itdügüm
Günde biñ kez baña cevr itmek olupdur az aña
Şöyle pervâz-ı bülend eyler ki ey dil ol hümâ
Evc-i Pervîn’e ire irişmeye âvâz aña
Bezm-i gamda nâlemi ney kaddümi çeng eyledüm
Degme bir tanbûr olımaz Ravziyâ dem-sâz aña
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
