444
Mefâ‘îlün/ Mefâ‘îlün/ Mefâ‘îlün/ Mefâ‘îlün
Bu gülşende bilür misin niçe gül-pîrehensin sen
Hezârân bülbülin bir demde nâlân eyleyensin sen
Beni kaşuñ hayâliyle hilâle döndürüp her gün
Şafakveş çeşmümi her dem-be-dem pür-hûn idensin sen
Kesüp mikrâz-ı şîveyle ser-i zülf-i semensâsın
Hayâtumdan beni me‘yûs idüp ‘ömrüm kesensin sen
Süleymân’um gören aydur rakîbi âsitânuñda
Bu dergâha yaraşmaz dîv-sûret Ehrimen’sin sen
Dür-i eşküñ dökersin ruhların gördükçe ey Ravzî
Meger kim Rûm’a gelmiş hâce-i mülk-i ‘Aden’sin sen
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
