Mefâ`ilün fe`ilâtün mefâ`ilün fe`ilâtün
 
 1 Bu fasl içinde ki her gûşe oldı pür gül ü lâle
 Zebân-ı hâl ile dir mey görün piyâle piyâle
 
 2 Çog oldı hakkı bizüm üstümüzde bâde-furûşun
 Salâh odur ideyüz anı lutf-ı Hakka havâle
 
 3 Çü gamze hışm ider eyler nigâh-ı lutfı nevâziş
 Fedâ hezâr dil-i `âşık ol celâl ü cemâle
 
 4 Midâd-ı şevk ile pür eylesem nola gice gündüz
 Sahîfe-i dili üstâd-ı ‘aşk virdi kabâle
 
 5 Şu şart ile tutarın tîr-i yâre sînemi Yahyâ
 Çeküp hadengini alursa dilde demreni kala
 
 
Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147