Bir oda yohup-durur cânumı yâruñ fürkatı (638/1)
Kim içümden zâyil olmaz bir dem anuñ hurkatı
Yârdan ayru gözüm yaşlu içüm başlu-durur (638/2)
Şem bigi nice yahdı bini gör bu gurbeti
Saldı bini fürkatüñ bir mihnete ki_Eyyüb anı (638/3)
Görse râhat sana-y-ıdı kendüye-iren mihneti
Bu vücûdum dahı zahmetdür huzûruñsuz baña (638/4)
Rahmet it kim tâkatüm yoh çekmege bu zahmeti
Hasretüm bu ki_ölmedin görem seni vâ-hasretâ (638/5)
Gör ölüp iltem kıyâmet gönine bu hasreti
İdemez dilüm ibâret bu nihânî derdümi (638/6)
Bah gözüm hûn-âbesine kim göresin ibreti
Gün bigi rûşen ide-y-düm yüzüñüñ mâhiyyetin (638/7)
Kosa-y-ıdı aklumı dirmege zülfüñ hayreti
Mübtelâ hicrüñ belâsına beni takdîr ider (638/8)
Kimde var tedbîr-ile takdîri savmah kudreti
Kıla döndi zülfüñüñ fikrini kıla Ahmedî (638/9)
Çoh perîşânlıh getürür başa sevdâ fikreti
Dr. Yaşar AKDOĞAN, Ahmedî DÎVÂN https://ekitap.kulturturizm.gov.tr/Eklenti/10591,
