110-
Mef`ûlü Fâ`ilâtü Mefâ`îlü Fâ`ilün
1 Bir haste yok cihânda ki benden beter düşer
Tîr-i kazâ efendi baña ol kadar düşer
2 `Âlemde bundan özge elem var mıdur `aceb
Kim vasl ümîdi var iken añsız sefer düşer
3 Her kim sorarsa `âlem-i `aşkuñ haberlerin
Bir hâlet irişür aña kim bî-haber düşer
4 Mihmân olınca tekye-i derdüñde dem-be-dem
Bu dâne-i sirişk öñüme mâ-hazar düşer
5 Dirmiş rakîb göñli düşer baña dil-berüñ
Va’llâhi ibtidâ başına bir hacer düşer
6 Bilmem efendi kim bu ne sırr-ı `acîb olur
Şi`r-i Ziyâ’î la`lüñ añıldukça ter düşer
Dr. Müberra GÜRGENDERELİ, MOSTARLI HASAN ZİYÂ’Î DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3195 KÜLTÜR ESERLERİ
