Müstef`ilün müstef`ilün müstef`ilün müstef`ilün
1 Bir çâre bulmaz derdine bî-çâre gönlüm neylesün
Bir cây-ı âsâyiş mi var âvâre gönlüm neylesün
2 Seng-i cefâ ile yıkup dil-dâr mir'ât-i dili
Yine dürüst olmak diler sad pâre gönlüm neylesün
3 Şol şerhalar kim eyledi şemşîr-i gamzen dil-berâ
Yok şerhe kâbil bir mahal pür-yâre gönlüm neylesün
4 Dirsin nigâh-ı lutfumı dilden murâd itmek gerek
Çeşmün uyar ol gamze-i mekkâre gönlüm neylesün
5 Her gül mey-i âl ile pür-peymânedür Yahyâ bu gün
Gül devri kendin itmesün mey-hâre gönlüm neylesün
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
