112
Mefâ‘îlün mefâ‘îlün mefâ‘îlün mefâ‘îlün
1 Bir ân var arada ânı o hüsn-istâna uydurmuş
Şu‘â‘-ı nûr-ı feyziñ cümle hûb-istâna uydurmuş
2 İki nûn manzara kurmuş dil-i ‘uşşâkı sayd içün
Saf-ı câdû-yı hûn-rîzi ‘aceb mestâne uydurmuş
3 İhâta eylemiş cîm-i cemâli Yûsuf-istânı
Atup bir nokta-i iksîr bu sun‘-istâna uydurmuş
4 Niçe biñ nagmeyi bir savtdan îcâd idüp ol şûh
Giçürüp halka-i hâdan bu sûr-istâna uydurmuş
5 Kumâş-ı vech-i dil-cûda benek-bâfendedür bir bak
Metâ‘-ı dil-pezîr-i hâsı Hindû-stâna uydurmuş
6 Kabâlar uydurup kâmetlere hayyât-ı pür-san‘at
Mücerred mü’mine degil Fireng-istâna uydurmuş
7 Yürüdüp kudretinden âb-ı sâfı bâg u eşcârda
Niçe biñ sun‘un ey Sıdkî bu nahl-istâna uydurmuş
Dr. Abdullah EREN, MEHMED SIDKÎ DÎVÂNI, https://ekitap.kulturturizm.gov.tr/Eklenti/10625,mehmed-sidki-divanipdf.pdf?0
