FāǾilātün/FāǾilātün/FāǾilātün/FāǾilün
1. Bilmezem kim dil-ber içün dil nice tedbīr ider
Bir perī-peykerdür anı nicesi tesħīr ider
2. Śūretin naķşın görelden gözlerüm merdümleri
Dem-be-dem levĥ-i zer üzre naķşlar taśvīr ider[2]
3. Dün gice zülf-i siyāhuň düşüme girdügini
Kime dirsem Ǿömrüm uzunluġına taǾbīr ider
4. Āhenīn göňlüňe āhum āh kim kār itmedi
Gerçi āh u nālemüz pūlāda da teǿŝīr ider
5. Baħtumı bī-dār iderse ħˇāb-ı ġafletden benüm
Her seĥer-gāh āhum ile nāle-i şeb-gīr ider
6. Yüzüňi sürmek dilersin gerd-i rāhına Münīr
İtmegil nā-geh izi tozını yüzüň kir ider
Ersen Ersoy, Münirî Dîvânı, : T.C. Kültür ve Turizm Bakanlığı Kütüphaneler ve Yayımlar Genel Müdürlüğü, 2017 ISBN: 978-975-17-3803-5 Ana Yayın Numarası: 3557 Kültür Eserleri Dizisi-560
