Murabba’
[Fâ’ilâtün Fâ’ilâtün Fâ’ilün]
− · − − / − · − − / − · −
-I-
Bî-kusûr esbâb-ı hüsnüñ ser-be-ser
Sen meleksin yâ perîsin iy peser
Böyle olur mı güzel nesl-i beşer
Her gören sen dilberi cândan sever
-II-
Bir perîsin nutkuñ âdem cânıdur
Bir meleksin sohbetüñ rûhânîdür
Saña hem hûrî dimek erzânıdur
Her gören sen dilberi cândan sever
-III-
Şîve-i kadd-ile hüsn ü ânla
Lutf-ı güftâr-ı leb-i handânla
‘Âşık olur gördügi dem cânla
Her gören sen dilberi cândan sever
-IV-
Seyr iden nâz-ıla reftâruñ senüñ
Gûş iden lutf-ıla güftâruñ senüñ
Olur ânîde hevâ-dâruñ senüñ
Her gören sen dilberi cândan sever
-V-
Seyr iden hüsn-ile sen meh-peykeri
Şevk birle saña olur müşterî
Nazmî gibi iy güzeller serveri
Her gören sen dilberi cândan sever
Yrd. Doç. Dr. Sibel ÜST, EDİRNELİ NAZMÎ DÎVÂNI (İNCELEME-METİN) T. C. KÜLTÜR VE TURİZM BAKANLIĞI, 2012 www.kulturturizm.gov.tr
