109
Fâ‘ilâtün/ Fâ‘ilâtün/ Fâ‘ilâtün/ Fâ‘ilün
Bezm-i hicrânuñda kaddüm çeng ü nâlem nây idüp
Mest-i ‘ışk itdüñ beni ‘âlemlere rüsvâ idüp
Tîrveş yabana atarduñ beni çün ‘âkıbet
Ey kemân-ebrû elif kaddüm n’iderdüñ yây idüp
İtlerüñ karşu gelüp dâmânum aldılar benüm
Üstühânum pâre pâre eylediler pây idüp
Yûsuf-ı Ken‘ân-ı hüsn itmiş seni feyz-i Hudâ
Mısr-ı ‘ışk içre beni tûtî-i şekker-hây idüp
Tîr-i cevri ol kemân-ebrûnuñ ey Ravzî yine
Sînemüñ çak sadr-ı a‘lâsına geçdi cây idüp
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
