Mefâ‘îlün Mefâ‘îlün Mefâ‘îlün Mefâ‘îlün
 
 1 Beni her şeb o gül-ruhsârdan mehcûrdur dirler 
 Ne devletdür kişi mahzûn iken mesrûrdur dirler
                                                           
2 Ne keyfiyyet virür ‘uşşâka bilmem yâd-ı la‘lün kim
 Kimin mestâne dirlerse kimin mahmûrdur dirler
 
3 Ne bilsünler bütân-ı seng-dil hâl-i dil-i zârı
 Habâbı görmeyenler kâse-i fagfûrdur dirler
 
 4 Dem-â-dem târ-ı eşküm sînem üzre çekdügümçündür
 Ki âhum gûş idenler nagme-i tanbûrdur dirler
 
 5 Sülûkundan kemâl-i kâbiliyyetdendür Âgâhı
 Eger üftâdedür dirler eger magrûrdur dirler
 
Dr. ŞERİFE AKPINAR’ ÂGÂH (Semerkândî-i Âmidî) DÎVÂN, KÜLTÜR VE TURİZM BAKANLIĞI KÜLTÜR ESERLERİ 502  2012,