Beni bir dil-rübâ-yı şûh içün magbûn iden tâli‘

 
Harfü’l-‘ayn
88.
.--- / .--- / .--- / .---
 
Beni bir dil-rübâ-yı şûh içün magbûn iden tâli‘
Beni çün Kays-ı Leylâ-veşe mecnûn iden tâli‘
Gama ser-mâye olsun diyü mülk-i Rûm-ı şûm içre
Dilüm yek-bûseye bir kâfire merhûn iden tâli‘
Cihânda dest-res olsun diyü nân-pâre-i huşkuñ
Beni pervâne-âsâ gird-i bâb-ı dûn iden tâli‘
Beni idüp tüvân-ger mâl-i hulyâ ile ‘âlemde
Künûz-ı fikr-i gamla mislde Kârûn iden tâli‘
Sa‘îdâ-veş beni her târ-ı nâ-sâzî-i çarh ile
Hevâ-hîz-i figâna sînemi kânûn iden tâli‘

Saadet Karaköse, : Sa’id Giray Dîvânı, : © T.C. Kültür ve Turizm Bakanlığı Kütüphaneler ve Yayımlar Genel Müdürlüğü,2017 ISBN: 978-975-17-3636