Fâ`ilâtün fâ`ilâtün fâ`ilâtün fâ`ilün
 
1 Bâde-i `aşk ile medhûş olmayan bilmez beni
 Bezm-i mihnetden kadeh-nûş olmayan bilmez beni
2 Hâlüm anlar var ise Mecnûn ile Ferhâd'dur
 Hâsılı bî-`akl u bî-hûş olmayan bilmez beni
3 Ben ol abdâlum ki oldum mahrem-i esrâr-ı `aşk
 Tekye-i gamda `abâ-pûş olmayan bilmez beni
4 Ber-karâr olmadugum `ayb itme kim deryâ gibi
 Geh hamûş u gâh pür-cûş olmayan bilmez beni
5 Şimdi ey Yahyâ benüm bahr-i le'âl-i ma`rifet
 Sözlerüm gûşında mengûş olmayan bilmez beni
 
 
Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147