38.
- - . / . - - . / . - - . / . - -
1.‘Aşk ile girer ‘arsa-ı merdâna girenler
Göñlinde olandur yine meydâna girenler
2.Hûn-ı müjeñüñ havfı ile şimde yatakda
Peykân-ı ciger-dûz gibi kana girenler
3.Havf ile yem-i gamda şinâverlük olur mı
Bî-bâk gerek lücce-i ‘ummâna girenler
4.Koynına giren dil-berüñ el sunmamak olmaz
Küstâh olur elbette gülistâna girenler
5.Mestâne yine râzını fâş itdi ‘Atâyî
Şûrîde çıkar halka-ı rindâna girenler
Saadet KARAKÖSE, NEV’Î-ZÂDE ATÂYÎ DÎVÂNI, Malatya 1994
