Fâ`ilâtün fâ`ilâtün fâ`ilâtün fâ`ilün
1 Aşk elinden gül perîşân lâle de dâg-ı derûn
Goncenün dünyâyı dahı görmemişken bagrı hûn
2 Aşk te'sîrin görün kim ol kadar temkîn ile
Tîşe-i Ferhâd'dan kendin tagıtdı bî-sütûn
3 Dil-berün pîrâye-i hüsni ruh-ı gül-rengidür
Aşıkun ser-mâye-i kârı sirişk-i lâle-gûn
4 Kanda bir`âkil ki var nâm ü nişândan bî-nasîb
Kays'ı meşhûr itmede dünyâya ünvân-ı cünûn
5 Pençesin meydân-ı istignâda kimse burmadı
Kuvvet-i bâzû-yı aşkun itdi Yahyâ'yı zebûn
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
