213
- . - - / - . - - /- . - - /- . –
 
‘Âşıkı odlara yakar dil-rübâsı Bursanun
Ey gönül germ olma ıssıdur havâsı Bursanun
Râ kaşıyla her hilâl-ebrûsu eyler merhabâ
Dostlar hoşca gelür bana burası Bursanun
Kendüyi yüksek dutar hûrşîd-i ‘âlem-tâbdan
Yere inmez neyleyem her meh-likâsı Bursanun
Yaray’ ibrîşim götürmez zülf-i dildârı gören
Hâce-i ‘âlem geçer her bir gedâsı Bursanun
Issıcak yüz gösterüp öper kuçar dil-berleri
Rind-i ‘âlemdür Revânî kaplucası Bursanun
 
Ziya Avşar, REVÂNÎ DÎVÂNI, KÜLTÜR VE TURİZM BAKANLIĞI YAYIMLARI ,ISBN 978-975-17-3352-8