350-
Fâ`ilâtün Fâ`ilâtün Fâ`ilâtün Fâ`ilün
1 `Âşıkı mahzûn iden `âlemde şâdân olmasun
`Andelîbi agladan gül gibi handân olmasun
2 Bize câm-ı gam rakîbe la`lüñi sunmak neden
Ey gözi hûnî sakın devrüñde bir kan olmasun
3 Güller açıldukça gülsün güllerüñ ey gonca-leb
Sünbül açıldıkça zülfeynüñ perîşân olmasun
4 Başumuz tob itmişüz meydân-ı `aşk-ı yâra biz
Tutalum ol şeh-süvâruñ zülfi çevgân olmasun
5 İhtiyâr it zahmeti öldür beni ey nev-cevân
Bende gam sende cefâ kûyuñda efgân olmasun
6 Müşterîyüz nakd-i cân ile metâ`-ı vasluña
Korkaruz bir gizlü yirde soñra hicrân olmasun
235
7 Bûsesini nakd-i câna virmege ahd eylemiş
Cân virürdüm ben hemân dil-ber peşîmân olmasun
8 Hâk u zer dirler berâberdür yanuñda korkaram
`Âşık-ı zer-çehreler hâk ile yeksân olmasun
9 Katre-i eşk-i Ziyâ’îden sakın ey dürr-i pâk
`Âlemi gark itmesün bir demde `ummân olmasun
Dr. Müberra GÜRGENDERELİ, MOSTARLI HASAN ZİYÂ’Î DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3195 KÜLTÜR ESERLERİ
