Mef`ûlü mefâ`îlü mefâ`îlü fa`ûlün
 
 1 Arâm idemem bûs u kenâr eylemeyince
 Sînemde gelüp yâr karâr eylemeyince
 2 Fârig olamam deşt-i talebde tek ü pûdan
 Ol gözleri âhûyı şikâr eylemeyince
 3 `Ayb eylemenüz her gice feryâd u figânum
 Râhat bulamam nâle vü zâr eylemeyince
 4 Ol yâr işiginde bize yer komadı agyâr
 Olmadı gönül terk-i diyâr eylemeyince
 5 Bâzâr-ı mahabbetde ruh-ı zerde bakılmaz
 Tâ sırma-keş-i `aşkı `ayâr eylemeyince
 6 Kan aglamaga başladı zahm-ı dil-i Yahyâ
 Açılmadı çak cânına kâr eylemeyince
 
 
Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147