Fâ‘ilâtün/ Fâ‘ilâtün/ Fâ‘ilâtün/ Fâ‘ilün
‘Âlem-i îcâda biz iznile gelmiş cânlaruz
Cilvegâh-ı dehr içinde sevgilü cânânlaruz
Mihr zerrîn topumuzdur mâh-ı nev çevgânumuz
Sanma bu meydânda iller gibi ser-gerdânlaruz
Âftâbuz kim nihânuz zerre-i nâ-çîzde
Bizi gâfil çaglama kim katrede ‘ummânlaruz
Fahrdur sûret binâsını harâb itmek bize
Kenz-i mahfî birle biz ma‘mûr olan vîrânlaruz
Kûhveş ‘asker olup gelse ‘adû-yı bî-şümâr
Berg-i kâha saymazuz anı ‘aceb sultânlaruz
Çâr-sûmuzda ne isterseñ bulursuñ gel berü
Mısr-ı câmi‘ nâmumuzdur biz şu şehristânlaruz
Yüzümüz zer gözümüz sîm eşkümüz la‘l u ‘akîk
Ey Behiştî biz cevâhirle pür olmış kânlaruz
Dr. Yaşar AYDEMİR, BEHİŞTÎ DÎVÂNI, https://ekitap.kulturturizm.gov.tr/
