590
Mef‘ûlü/ Fâ‘ilâtü/ Mefâ‘îlü/ Fâ‘ilün
Döndi hat-ı nigâra Misâlî gazelleri
Âhû-yı çeşm-i yâre Gazâlî gazelleri
Ta‘n oklarını gerçi ‘adû gönderür baña
Dâfi‘dür anı dilde Cidâlî gazelleri
‘Ahd eyledükce mihr ü vefâ itmege o meh
Melhûz olur göñülde Me’âlî gazelleri
‘Âşıklara cefâlaruñı vasf ider senüñ
Cevrî gazelleriyle Celâlî gazelleri
Dür dişlerüñle la‘l-i lebüñ fikrin itdürür
Okunsa bezm-i meyde Leâlî gazelleri
Bâg-ı vefâda dindi senüñ serv-i kaddüñe
Nahlî gazelleriyle Nihâlî gazelleri
Hâl-i ‘izârı vasfın ider sâde-rûlaruñ
Ravzî’nüñ ola sanma ki hâlî gazelleri
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
