Fe`ilâtün fe`ilâtün fe`ilâtün fe`ilün
1 Açdı dil bâl ü per-i himmeti pervâne gibi
Şevk ile şu`le-i şem`-i ruhuna yane gibi
2 Halka-i zikrde gör bagrı delik `âşıkları
Dest-i kudretde döner sübha-i sad dâne gibi
3 Her yana baş alup gitmege bir hâ'il yok
Mesken olmaz dil-i dîvâneye vîrâne gibi
4 Dil mi virdüm sana kim şîve vü nâzun götürem
Ey felek cevri koy a cânuma cânâne gibi
5 Aşinâdur dil-i Yahyâ ile gerçi gam-ı yâr
Dâ'imâ cevr ü cefâda yine bî-gâne gibi
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
