Aç kelįm-i Ĥaķ’a yol sįnede çün Baĥr-ı Süveyş

FeǾilātün FeǾilātün FeǾilātün FeǾilün

1 Sözde ŝābit-ķadem ol muĥkem-i tenzįl gibi

Nüsħ ü taĥrįfi ķabūl eyleme İncįl gibi

2 Aç kelįm-i Ĥaķ’a yol sįnede çün Baĥr-ı Süveyş

Ĥayfdur pey-rev-i FirǾavn olasın Nįl gibi

3 Ŧoķınur başuňa ķalbān-ı ķażādan çengāl

Zāhidā Ǿaceb ile burnuň büyümüş fįl gibi

4 Bülbül-āsā ŧuramaz ħānede sevdā-zedeler

Mihr-i burc-ı ĥamele eyledi taĥvįl gibi

5 Yek-dil ü śāf-ı derūn olmadan iǾrāż itme

Ursa çengāle felek ger seni ķandįl gibi

6 Nüsħa-i nāz oķur eŧfāl-i zamān çeşminde

Şįve-i fennüňde ol āfet hele tekmįl gibi

7 Zerger-i ħāliś ü gevher gibi ol śāf-derūn

Şāhlar başda götürsün seni iklįl gibi

8 Kem nažardan anı taǾvįze dü-dest-i Ǿāşıķ

Śarılur gerden-i dildāre ĥamāǿil gibi

9 Ĥāmį gördüm bu gice kelb-i raķįbi ŧolanur

Cennet-i kūy-ı dil-ārāyı Ǿazāzįl gibi

 Diyarbakırlı Hâmî Ahmed Hayatı

KAYNAK:  Dr. Kadri Hüsnü YILMAZ, DİYARBAKIRLI HÂMÎ AHMED DİVANI, Ankara 2017